उज्यालो खबर
चितवन- गरिमा विकास बैंक लिमिटेडले आफ्नो १९औँ वार्षिकोत्सवको उपलक्ष्यमा देशभर १९ वटा सामाजिक उत्तरदायित्व (CSR) कार्यक्रम सम्पन्न गरेको छ। बैंकले आइतबार मात्र आठ स्थानमा रक्तदान कार्यक्रम सञ्चालन गरी ६०२ युनिट रगत संकलन गरेको जानकारी नायव प्रमुख कार्यकारी अधिकृत अनिल रेग्मीले दिए।
बैंकले सुनसरीको इटहरी, पर्साको वीरगञ्ज, चितवनको नारायणगढ, काठमाडौंको बालुवाटार, कास्कीको पोखरा, म्याग्दीको बेनी, रुपन्देहीको बुटवल र बाँकेको कोहलपुरमा रक्तदान कार्यक्रम गरेको थियो। नारायणगढमा मात्र ८१ जनाले रक्तदान गरेका छन्, जसमा १३ महिला र ६८ पुरुष रहेका शाखा प्रमुख तोया अधिकारीले जानकारी दिए।
रक्तदानसँगै बैंकले देशका १६ स्थानका विद्यालयहरूमा शैक्षिक सामग्री, विद्यालय पोशाक, पानी फिल्टर मेशिनलगायत सामग्री वितरण गरेको छ। साथै म्याग्दीको निस्कोट स्वास्थ्य चौकीलाई सरसफाइ सामग्री, चन्द्रागिरीस्थित मातातीर्थ वृद्धाश्रमलाई खाद्यान्न तथा सत्य साई राष्ट्रिय परिषद् नेपाल चितवनलाई वाटर डिस्पेन्सर हस्तान्तरण गरिएको बैंकले जनाएको छ।
यस वर्ष बैंकले “स्वस्थ जीवनशैलीका लागि खेलकुद” भन्ने नाराका साथ रोड रेस प्रतियोगिता पनि सम्पन्न गरेको छ, जसमा एक हजारभन्दा बढी धावक सहभागी भएका थिए। आगामी वर्षहरूमा पनि यस्ता सामाजिक कार्यलाई प्राथमिकतामा राख्दै रोड रेस निरन्तर आयोजना गर्ने योजना बैंकले अघि सारेको छ।
उद्घाटन समारोहमा रेग्मीले बैंक बि.सं. २०६३ सालमा स्याङ्जाबाट तीन जिल्लालाई कार्यक्षेत्र बनाउँदै दुई करोड ६४ लाख रुपैयाँको पूँजीसहित सञ्चालनमा आएको स्मरण गरे। हाल बैंक ३८ जिल्लामा १२६ शाखासहित ६ अर्ब २ करोड रुपैयाँ पूँजीमा विस्तार भइसकेको उनले बताए। उनका अनुसार बैंकमा हाल १,०५० कर्मचारी, १० लाख सेवाग्राही र ४० हजार ऋणी छन्।
“शेयरधनी, कर्मचारी, सेवाग्राही र शुभचिन्तकहरूको सामूहिक सहयोगकै कारण बैंक आजको सफलतामा पुगेको हो,” रेग्मीले बताए। कार्यक्रममा शुक्रपथ टोल विकास संस्थाका अध्यक्ष सन्तोष श्रेष्ठ, बैंकका क्षेत्रीय तथा शाखा प्रमुख, पत्रकार र कर्मचारीहरूको उपस्थिति थियो।
बैंकले आजै सत्य साई राष्ट्रिय परिषद् नेपाल चितवनलाई वाटर डिस्पेन्सर हस्तान्तरण गरेको छ।
