उज्यालो खबर
चितवन — निर्माण सामग्री (हार्डवेयर) व्यवसायी संघ चितवनको विस्तारित बैठक मंसिर ४ र मंसिर ५ उत्साहपूर्ण वातावरणमा सम्पन्न भएको छ। पदाधिकारी, सल्लाहकार तथा सदस्यहरूको उपस्थितिमा बसेको उक्त बैठकले चितवन उद्योग वाणिज्य संघको आगामी अधिवेशनका लागि अध्यक्ष पदमा युवा व्यवसायी सिरीष पन्तलाई सिफारिस गर्ने सर्वसम्मत निर्णय गरेको छ।
बैठकले पन्त व्यवसायिक समस्यालाई नजिकबाट बुझ्न सक्ने, निष्पक्ष दृष्टिकोण, स्पष्ट कार्ययोजना र व्यवसाय–मैत्री नेतृत्व क्षमता भएको व्यक्तिका रूपमा योग्य ठहरिएको जनाएको छ। संघका अध्यक्ष नरहरी घिमिरेका अनुसार, “संघले उनलाई केवल एक उम्मेदवार होइन, परिवर्तनको नेतृत्व गर्न सक्ने, परिणाम देखाउने र व्यवसायीको हितलाई सर्वोपरि राख्ने वास्तविक नेतृत्वकाे रूपमा प्रस्तुत गरेको हो,” भन्ने अभिव्यक्ति बैठकमा प्रस्तुत गरिएको थियो।
संघले उद्योग–व्यवसाय अहिले परिवर्तनको संवेदनशील मोडमा रहेको उल्लेख गर्दै योग्य नेतृत्व रोज्ने महत्वपूर्ण समय आएको पनि बताएको छ। संस्थाको भविष्य, व्यवसायीको सुरक्षा, पारदर्शिता, व्यावसायिक सहजता तथा दीर्घकालीन विकास जस्ता विषयमा निर्णयको प्रत्यक्ष प्रभाव पर्ने भएकाले सबै उद्योगी–व्यवसायीलाई जिम्मेवारीपूर्वक मत दिन संघले अपिल गरेको छ।
वर्षौंदेखि व्यवसायीको हितमा सक्रिय भूमिका निभाउँदै आएका सिरीष पन्त सेवा र परिणाममा विश्वास राख्ने, दबाबमा नझुक्ने तथा व्यक्तिगत स्वार्थमा विचलित नहुने युवा नेतृत्वका रूपमा प्रस्तुत हुँदै आएका छन्। संघले पन्तलाई युवा ऊर्जा, आधुनिक संस्थागत रूपान्तरण, निर्माण सामग्री व्यवसायीको साझा आकांक्षा र चितवनको व्यापारिक संरचना सुदृढीकरणका लागि सबैभन्दा योग्य र विश्वसनीय विकल्पका रूपमा व्याख्या गरेको छ।
संघका अनुसार पन्तलाई दिइने प्रत्येक मत चितवनका उद्योग–व्यवसायको स्थायित्व, पारदर्शिता र समृद्ध भविष्यमा लगानी जस्तै हुने बताइएको छ। केवल नेतृत्व परिवर्तन मात्र होइन, आगामी पुस्ताले पाउने अवसर, सम्मान र व्यवसायिक वातावरण सुरक्षित गर्ने महत्वपूर्ण निर्णय गर्ने क्षण आएको संघले उल्लेख गरेको छ।
अन्त्यमा, संघले सबै सम्मानित उद्योगी–व्यवसायीलाई निष्पक्ष, निर्भय र जिम्मेवार भएर सिरीष पन्तलाई आफ्नो बहुमूल्य मत दिन हार्दिक अपिल गरेको छ। संघका अनुसार, “तपाईंको एक मतले चितवन उद्योग वाणिज्य संघलाई पारदर्शी, व्यवसाय–मैत्री, परिणाममुखी र युवा दृष्टिकोणसहित अघि बढाउने सामूहिक लक्ष्य पूरा हुनेछ।”
