उज्यालो खबर
गैँडाकोट । नवलपुरको गैँडाकोटमा रहेको गैंडाकोट इंलिस स्कुलका विद्यार्थीहरूले आइतबार देवघाटमा रहेका जेष्ठ नागरिकहरुलाई फलफुल वितरण संगै बेलुकाको एकछाक खाना खुवाएका छन् । देवघाट क्षेत्र विकास समितिद्वारा संचालित देवघाट समाज कल्याण केन्द्र वृद्धाश्रममा रहेका जेष्ठनागरिकहरुलाई फलफूल वितरण सहित बेलुकाको खाना खुवाएको स्कुलले जनाएको छ ।
आफ्नो जन्मदिनमा विद्यार्थीहरुले नै सहयोग गरि सक्षम हुनेले नहुनेलाई सहयोग गर्ने अभियान विद्यालयले चलाएपछि रकम संकलन हुने गरेको छ । त्यहि दान पेटिकामा जम्मा भएको विद्यार्थीहरुको रकमबाट जेष्ठनागरिक आमा बुवाहरुलाई फलफुल वितरण सहित बेलुकाको खाना खुवाईएको स्कुलका प्राचार्य हिरालाल अर्यालले बताउनुभयो ।
प्राचार्य अर्यालले स्कुलले सामाजिक उत्तरदायीत्व बहन गर्न सदैव तयार रहेको भन्दै आगामी दिनमा समेत जेष्ठ नागरिकहरुको सहयोगका लागि स्कुलले सहयोगका कामहरुलाई निरन्तरता दिने बताउनुुभयो ।देवघाट क्षेत्र विकास समितिद्वारा संचालित देवघाट समाज कल्याण केन्द्र बृद्धाश्रममा ३५ जना बृद्धआमाबुवाहरु रहनु भएको छ ।
