उज्यालो खबर
चितवन । चितवन राष्ट्रिय निकुञ्जमा दुर्लभ एकसिंगे गैंडा तस्करले मारेका छन् । निकुञ्जको माडी बगई सेक्टर अन्तर्गत घाँघरको बाटुलिचौरमा खाग काटिएको अवस्थामा मृत गैंडा फेला परेको हो ।
साउन ११ गते मृत गैंडा फेला परेको भए पनि हालसम्म गोप्य नै राखिएको थियो । निकुञ्जका प्रमुख संरक्षण अधिकृत अणनाथ बरालले खाग काटिएको अवस्थामा अन्दाजी २० वर्षको गैंडा मृत फेला परेको जानकारी दिनुभयो । बरालका अनुसार गैंडा हिलोमा गडेका कारण हड्डी मात्रै भेटिएको छ । कम्तीमा दुई महिना अघि गैंडा मरेको हुन सक्ने आशंका गरिएको छ । खाग काटिएको र टाउकोको हड्डीमा गोलि लागेको जस्तो चोट देखिएको छ ।
नेपाली सेना र निकुञ्जका कर्मचारीको संयुक्त गस्तीले गैंडा मृत अवस्थामा फेला पारेको हो । त्यस लगत्तै घटननाको अनुसन्धान अघि बढाईएको छ । उहाँले अनुसन्धान अघि बढेको र तस्कर नजिक पुगेको बताउनुभयो । गैंडा कुहिएकाले लिंग पहिचान हुन सकेको छैन । घटना लगत्तै कारागारबाट छुटेका र अन्य शंकास्पदमाथि अनुसन्धान थालिएको छ ।
