उज्यालो खबर
भरतपुर — लियो क्लब अफ भरतपुर युथको आयोजना तथा लायन्स क्लब अफ भरतपुर युथको प्रायोजनमा जिल्लास्तरीय चित्रकला प्रतियोगिता भव्यताका साथ सम्पन्न भएको छ। भरतपुरस्थित अर्किड स्कुलको प्राङ्गणमा सञ्चालन गरिएको उक्त प्रतियोगिता “महिला सशक्तीकरण र लैङ्गिक समानता” विषयमा केन्द्रित रहेको थियो।
विद्यार्थीहरूमा लुकेर रहेको कलात्मक प्रतिभा प्रस्फुटन गराउने र सामाजिक विषयवस्तुप्रति सचेतना फैलाउने उद्देश्यले आयोजित प्रतियोगितामा चितवन जिल्लाका २० वटा विद्यालयका ३४ जना विद्यार्थीहरूले उत्साहजनक सहभागिता जनाएका थिए।
कडा प्रतिस्पर्धाका बीच सनराइज स्कुलकी काव्या आचार्य प्रथम स्थान हासिल गर्न सफल भइन्। त्यसैगरी, ओम शान्ति स्कुलका साइमन सिङ द्वितीय तथा नारायणी मोडल स्कुलकी जेनिशा सासु मगर तृतीय भएका छन्।
लियो क्लब अफ भरतपुर युथका अध्यक्ष लियो सङ्गम पोखरेलको सभापतित्वमा सम्पन्न भएको सो कार्यक्रममा प्रमुख अतिथि लियो जिल्ला परिषद् ३२५ R का अध्यक्ष लियो लायन आत्मा राम पाण्डे रहनुभएको थियो।
त्यस्तै, विशिष्ट अतिथिका रूपमा अर्किड स्कुलका अध्यक्ष आकाश पौडेल, लायन्स क्लब अफ भरतपुर युथका अध्यक्ष लायन्स बालचन्द्र पोखरेल, लियो लायन नितिन बस्नेत, लियो पूजन अधिकारी तथा लियो विमोचन आचार्यको उपस्थिति रहेको थियो। कार्यक्रममा अतिथिहरूकै रूपमा लियो रक्षा कार्की र लियो किरण अधिकारी लगायतको पनि सहभागिता रहेको थियो।
समारोहलाई सम्बोधन गर्दै प्रमुख अतिथि लियो लायन आत्मा राम पाण्डे तथा सभापति लियो सङ्गम पोखरेलले विद्यार्थीहरूले क्यानभासमा उतारेका चित्रहरूले महिला सशक्तीकरणको गहिरो सन्देश दिएको बताउनुभयो। उहाँहरूले विजयी तथा सहभागी सम्पूर्ण विद्यार्थीहरूलाई बधाई दिँदै उनीहरूको उज्ज्वल भविष्यको कामना गर्नुभयो। साथै, आगामी दिनहरूमा पनि युवा तथा विद्यार्थी लक्षित यस्ता सिर्जनात्मक र क्षमता अभिवृद्धिका कार्यक्रमहरू निरन्तर सञ्चालन गरिने प्रतिबद्धता व्यक्त गर्नुभयो।
कार्यक्रमलाई सफल बनाउन विशेष सहयोग पुर्याएकोमा आयोजकका तर्फबाट मुख्य सहयोगी संस्था राइट एन्ड एसोसिएट्स तथा आतिथ्यता प्रदान गर्ने अर्किड स्कुल परिवारलाई धन्यवाद ज्ञापन गरिएको थियो।
