उज्यालो खबर
काठमाडौँ । विश्वभरका ७०० भन्दा बढी ह्याकर तथा क्लाउड सुरक्षा इन्जिनियर सहभागी रहेको प्रतिष्ठित ‘Wiz Cloud Security Championship’ मा फोर्ब्स कलेज चितवनका विद्यार्थी रञ्जन मरासिनी र विदिशा सुवेदीले उल्लेखनीय उपलब्धि हासिल गरेका छन्। एक वर्षे यो अन्तर्राष्ट्रिय प्रतिस्पर्धाको छैटौँ महिनासम्म आइपुग्दा उनीहरूले क्रमशः २२औँ र २९औँ स्थान सुरक्षित गर्न सफल भएका हुन्।
क्लाउड सुरक्षामा आधारित यो प्रतियोगितामा AWS, GCP, Kubernetes जस्ता प्लेटफर्ममा वास्तविक सुरक्षागत कमजोरीका आधारमा हरेक महिना नयाँ ‘क्याप्चर द फ्ल्याग (CTF)’ चुनौती प्रस्तुत गरिन्छ। अत्यन्त कठिन मानिने यी चरणहरू पार गर्दै २४ वर्षीय रञ्जन मरासिनी, जो ‘Noob Injected’ नामबाट प्रतिस्पर्धा गर्दै आएका छन्, सुरुआतमा ७०औँ स्थानभन्दा तल रहे पनि अघिल्लो महिनाको जटिल Kubernetes चुनौती सफलतापूर्वक समाधान गरेपछि एकैपटक २२औँ स्थानमा उक्लिएका छन्।
त्यस्तै, विदिशा सुवेदीले पनि निरन्तर उत्कृष्ट प्रदर्शन गर्दै विश्व–स्तरमा २९औँ स्थान हात पारेकी छन्। क्लाउड सुरक्षा क्षेत्रमा महिला सहभागिता न्यून रहेको अवस्थामा सुवेदीले हासिल गरेको यो उपलब्धि नेपालका लागि प्रेरणादायी बनेको छ।
सो प्रतियोगितामा नेपालबाट थोरै विद्यार्थीले मात्र विशेष निमन्त्रणा तथा छनोट प्रक्रियामार्फत सहभागी हुने अवसर पाएका छन्। दुवै विद्यार्थी फोर्ब्स कलेज चितवनमा साइबर सिक्युरिटी विषयमा अध्ययनरत छन्, जहाँ उनीहरूले क्लाउड सुरक्षा, एथिकल ह्याकिङ, नेटवर्क डिफेन्सलगायतका विषयमा दक्षता हासिल गर्दै आएका छन्।
प्रतियोगिताका उत्कृष्ट सहभागीले इजरायल तथा अमेरिकामा मुख्यालय रहेको Wiz कम्पनीमा रोजगारीका अवसर, विश्वस्तरीय च्याम्पियनशिप बेल्ट तथा आकर्षक पुरस्कार प्राप्त गर्ने अवसर पाउनेछन्। मरासिनी र सुवेदी दुबैले आगामी चरणमा अझ कडा प्रतिस्पर्धा गर्दै विश्वको शीर्ष १० भित्र पर्नेकै लक्ष्य राखेका छन्।
फोर्ब्स कलेज चितवनले दुवै विद्यार्थीलाई बधाई ज्ञापन गर्दै उज्ज्वल भविष्यका लागि शुभकामना दिएको छ।
