उज्यालो खबर
काठमाडौं । चितवनको माडी–ठोरी सडकखण्डअन्तर्गत पटारी खोलामा वर्षौंदेखि रोकिएको पुल निर्माणको ठेक्का सरकारले रद्द गरेको छ। हुलाकी राजमार्ग निर्देशनालयअन्तर्गत वीरगञ्जस्थित आयोजना योजना कार्यालयले आज सूचना जारी गर्दै ठेक्का तोडिएको जानकारी दिएको हो।
४१ मिटर लामो पुल निर्माणको जिम्मा लोहनी एण्ड ब्रदर्स प्रालि, भरतपुरले पाएको थियो। तर काम सुरु नगरी अलपत्र छाडेको र ठेकेदार कम्पनीका प्रतिनिधि लामो समयदेखि सम्पर्कविहीन भएकाले ठेक्का रद्द गरिएको निर्देशनालयले जनाएको छ।
निर्देशनालयले यसअघि निर्माण व्यवसायीलाई “किन ठेक्का नतोड्ने” भनेर १५ दिनभित्र स्पष्टीकरण पेश गर्न माग गरेको थियो। तर स्पष्टीकरण नआएको, काम अघि नबढेको र प्रतिनिधि समेत सम्पर्कमा नआएपछि ठेक्का तोडिएको सूचनामा उल्लेख छ।
अब सार्वजनिक खरिद ऐन, २०६३ को दफा ५९(९८०) अनुसार कम्पनीको कार्य सम्पादन जमानत जफत गरिने, बाँकी काम पूरा गर्न राज्यले खर्च गर्नुपर्ने रकम सरकारी बाँकीसरह असुल गरिने र निर्माण कम्पनीलाई कालोसूचीमा राख्न सिफारिस गरिने निर्देशनालयले जनाएको छ।
यससँगै हालसम्मको अद्यावधिक काम र बाँकी कामको नापजाँच तथा मूल्यांकनका लागि १५ दिनभित्र कार्यालयमा उपस्थित हुन पनि भनिएको छ। उपस्थित नहुँदा नापजाँच कार्यालयले नै गर्ने स्पष्ट गरिएको छ।
यसअघि सरकारले झापाको कन्काई पुल, जुन १४ वर्षदेखि अलपत्र थियो, त्यसको ठेक्का पनि रद्द गरिसकेको थियो।
