उज्यालो खबर
सिद्धार्थ बैंक नेपाल प्रिमियर लिग (एनपिएल)मा आज कीर्तिपुरस्थित त्रिवि क्रिकेट मैदानमा दुई महत्वपूर्ण खेल हुँदै छन्। पहिलो खेल बिहान पौने १२ बजे चितवन राइनोज र काठमाडौं गोर्खाज बीच हुने छ भने दोस्रो खेल अपराह्न ४ बजे विराटनगर किंग्स र कर्णाली याक्स आमनेसामने हुनेछन्।
पहिलो मैच दुवै टोलीका लागि बराबरी महत्वको छ। दुवैले अहिलेसम्म २–२ खेल जितेका छन्। काठमाडौंले आज प्रतियोगिताको पाँचौं खेल खेल्दै छ भने चितवनको यो तेस्रो खेल हुनेछ। चितवनले एक खेलमा हार बेहोरेको छ भने काठमाडौंले दुई खेलमा पराजय व्यहोरेको छ।
चितवन राइनोजले उद्घाटन खेलमा कर्णाली याक्सलाई ४ विकेटले हराएको थियो। दोस्रो खेलमा लुम्बिनी लायन्ससँग ६ विकेटले पराजित भएपनि तेस्रो खेलमा विराटनगर किंग्सलाई ४८ रनले पराजित गर्दै उत्कृष्ट पुनरागमन गरेको थियो।
काठमाडौं गोर्खाजले भने पहिलो खेलमा जनकपुर बोल्ट्सलाई ५ विकेटले हराए पनि दोस्रो खेलमा सुदूरपश्चिमसँग २९ रनले र तेस्रो खेलमा विराटनगर किंग्ससँग ५ विकेटले पराजित भएको थियो। चौथो खेलमा काठमाडौंले लुम्बिनी लायन्सलाई २२ रनले हराएर आत्मविश्वास फर्काएको छ।
दोस्रो खेलमा विराटनगर किंग्स र कर्णाली याक्स भिड्दैछन्। विराटनगरले अघिल्ला चार खेलमध्ये तीन खेलमा विजयी बन्दै ६ अंक जोडेर अंकतालिकाको दोस्रो स्थान कायम राखेको छ। उसले पोखरा एभेन्जर्सलाई ५३ रनले, काठमाडौं गोर्खाजलाई ५ विकेटले र जनकपुर बोल्ट्सलाई ९ रनले पराजित गरेको थियो। चौथो खेलमा भने चितवनसँग ४८ रनले पराजित भएको थियो।
उता, कर्णाली याक्सले तीन खेल खेल्दै १ जित र २ हारसहित २ अंक जोडेको छ। उसले लुम्बिनी लायन्सलाई ९ विकेटले हराएको थियो भने चितवनसँग ४ विकेटले र सुदूरपश्चिमसँग ४५ रनले पराजित भएको थियो।
आजका खेलका लागि टोलीहरूले अनुभवी र विदेशी खेलाडीसमेत समावेश गरेका बलियो स्क्वाड उतार्दैछन्।चितवन राइनोजको नेतृत्व कुशल मल्लले गरिरहेका छन् भने काठमाडौं गोर्खाजको कप्तानी करण केसीको हातमा छ।त्यस्तै, विराटनगर किंग्सलाई सन्दीप लामिछानेले नेतृत्व गर्दैछन् भने कर्णाली याक्सको कमान सोमपाल कामीले सम्हालेका छन्।
एनपिएलको लिग चरण अन्तिम चरणतिर अग्रसर हुँदै गर्दा आजका दुवै खेलले अंकतालिकामा महत्वपूर्ण प्रभाव पार्ने अपेक्षा गरिएको छ।
