उज्यालो खबर
काठमाडौँ – नेकपा एमालेका वरिष्ठ उपाध्यक्ष ईश्वर पोखरेलले पार्टीको ११औँ महाधिवेशनका लागि अध्यक्ष पदमा उम्मेदवारी घोषणा गरेका छन्। उनले मंगलबार एक विज्ञप्ति जारी गर्दै पार्टी पुनर्गठन, रूपान्तरण र सामूहिक नेतृत्वलाई अघि बढाउने लक्ष्यसहित आफ्नो उम्मेदवारी सार्वजनिक गरेका हुन्।
विज्ञप्तिमा पोखरेलले पार्टीलाई “निर्णायक राष्ट्रिय शक्ति” का रूपमा विकास गर्ने प्रतिबद्धता व्यक्त गरेका छन्। पार्टीभित्रका कार्यकर्ताको योग्यता, क्षमता र रुचिअनुसार जिम्मेवारी वितरण गर्दै सामूहिक नेतृत्वलाई सुदृढ बनाउने उनको भनाइ छ।
यस्तै, पोखरेलले पार्टी अध्यक्ष केपी शर्मा ओलीले आन्तरिक लोकतन्त्रका मान्यताअनुसार नेतृत्व हस्तान्तरणमा सकारात्मक भूमिका खेल्ने अपेक्षा राखेको उल्लेख गरे। उनले ओलीलाई “अभिभावकीय भूमिका” मार्फत सहज संक्रमणका लागि सहयोग गर्न आग्रह गरेका छन्।
पोखरेलले पार्टीको सुदृढतामार्फत राष्ट्रको रक्षा र नेपाली जनताको हितलाई सर्वोपरि राखेर अघि बढ्नु वर्तमान आवश्यकता भएको पनि बताए।
