उज्यालो खबर
चितवन — भरतपुर महानगरपालिका–१० मालपोतचोकमा आज बिहान ग्यास बुलेट र मोटरसाइकल आपसमा ठोक्किँदा एक छोरीको मृत्यु भएको छ भने उनका बुबा घाइते भएका छन्।
प्रहरीका अनुसार काठमाडौँबाट वीरगञ्जतर्फ गइरहेको भारतीय नम्बर प्लेटको ग्यास बुलेट (NL 01 L 2453) ले बिहान करिब ७ बजे बा.प्र. ०६–००५प ३०५४ नम्बरको मोटरसाइकललाई ठक्कर दिएको थियो। दुर्घटनामा लमजुङ मध्यमनेपाल नगरपालिका–३का ५२ वर्षीय राजकुमार श्रेष्ठ घाइते भएका छन् भने पछाडि सवार १८ वर्षीया उनकी छोरी राइना श्रेष्ठ गम्भीर घाइते भएकी थिइन्।
दुर्घटनापछि दुबैलाई उपचारका लागि पुरानो मेडिकल कलेज, भरतपुर पुर्याइएको थियो। उपचारका क्रममा राइना श्रेष्ठको आज बिहान ८:४७ बजे मृत्यु भएको अस्पतालले पुष्टि गरेको प्रहरीले जनाएको छ। बुबा राजकुमार श्रेष्ठको उपचार भने जारी छ।
घटनास्थलमा जिल्ला प्रहरी कार्यालय चितवनका प्रमुख नायब उपरीक्षक (प्रनानि) हरिशंकर पण्डितको नेतृत्वमा टोली खटिएको थियो। दुर्घटनामा संलग्न ग्यास बुलेट तथा चालक प्रहरी नियन्त्रणमा रहेको जनाइएको छ।
