उज्यालो खबर
नवलपुर- नेपाली कांग्रेस नवलपुरले पार्टीभित्र देखिएका समसामयिक राजनीतिक, संगठनात्मक र वैचारिक चुनौतीको समाधानका लागि विशेष महाधिवेशन अपरिहार्य भएको ठहर गर्दै त्यसको पक्षमा दृढ समर्थन जनाएको छ।
जिल्ला सभापति महेन्द्रध्वज जसीले जारी गरेको विज्ञप्तिमा मुलुकको बदलिँदो राजनीतिक परिस्थिति, लोकतन्त्र र संविधानमाथि देखिएका चुनौती तथा पार्टी संगठनभित्र देखिएका असन्तुलनलाई समयमै सम्बोधन गर्न विशेष महाधिवेशन आवश्यक रहेको उल्लेख गरिएको छ। विज्ञप्तिमा पार्टीलाई विधि, विधान र लोकतान्त्रिक प्रक्रियामार्फत सुदृढ बनाउन विशेष महाधिवेशन नै उपयुक्त माध्यम भएको निष्कर्ष निकालिएको छ।
नेपाली कांग्रेसले ऐतिहासिक रूपमा लोकतन्त्र, समावेशीता र राष्ट्रिय एकताको पक्षमा नेतृत्वदायी भूमिका खेलेको स्मरण गराउँदै वर्तमान अवस्थामा पार्टीलाई थप एकताबद्ध, जिम्मेवार र जनमुखी बनाउन विशेष महाधिवेशनले महत्वपूर्ण भूमिका खेल्ने विश्वास व्यक्त गरिएको छ। विज्ञप्तिमा विशेष महाधिवेशनमार्फत पार्टीको वैचारिक स्पष्टता, संगठनात्मक मजबुती र नेतृत्वप्रति जनविश्वास पुनःस्थापित हुने अपेक्षा गरिएको छ।
विज्ञप्तिमा पार्टीभित्र देखिएका मतभेद र असन्तुष्टिलाई दबाउने नभई लोकतान्त्रिक संवाद र बहसका माध्यमबाट समाधान गर्नुपर्नेमा जोड दिइएको छ। यसका लागि विशेष महाधिवेशन नै सबै कार्यकर्ता र प्रतिनिधिको साझा मञ्च हुने जनाइएको छ।
नेपाली कांग्रेस नवलपुरले लोकतन्त्र, संविधान र संघीय लोकतान्त्रिक गणतन्त्रको रक्षा गर्दै पार्टीलाई समयसापेक्ष रूपमा अघि बढाउन केन्द्रीय नेतृत्व गम्भीर हुनुपर्ने उल्लेख गरेको छ। साथै पार्टीका सबै तहका नेता, कार्यकर्ता र शुभेच्छुकलाई विशेष महाधिवेशनको एजेन्डामा एकताबद्ध भई सकारात्मक भूमिका खेल्न आह्वान गरिएको छ।
अन्त्यमा विज्ञप्तिमा नेपाली कांग्रेसलाई जनताको भरोसाको पार्टीका रूपमा पुनःस्थापित गर्न विशेष महाधिवेशन अब विकल्प नभई आवश्यकता भइसकेको निष्कर्ष निकाल्दै त्यसका लागि आवश्यक पहल तुरुन्त थाल्न माग गरिएको छ।
