उज्यालो खबर
गैंडाकोट – नवलपुरको गैंडाकोटमा अवस्थित मौलाकाली केवलकार आजदेखि पुनः संचालनमा आएको छ। भाद्र २५ गतेदेखि बन्द रहेको केवलकार सेवा करिब दुई महिनापछि आजबाट नियमित रूपमा सञ्चालनमा आएको हो।
भाद्र २४ गते भएको तोडफोड र आगजनीका घटनाले बटम स्टेशनमा रहेका कार्यालय, फर्निचर र प्राविधिक उपकरणहरू क्षतिग्रस्त भएपछि केवलकार रोकिएको थियो। अष्ट्रियाली निर्माता कम्पनी डोपलमायरका प्राविधिक टोलीले आवश्यक सामग्रीसहित आएर पुनर्निर्माण तथा विस्तृत जाँच–पड़ताल सम्पन्न गरेपछि आजदेखि केवलकार पुनः सञ्चालनमा ल्याइएको स्टेशन म्यानेजर सुरज पौडेलले बताए।
उनका अनुसार केवलकार सञ्चालनमा आएको एक सातासम्म सूक्ष्म परीक्षण गरिएपछि मात्र सर्वसाधारणका लागि खोलिएको हो।“सुरक्षा हाम्रो पहिलो प्राथमिकता हो, त्यसैले निरन्तर परीक्षण गरेर मात्र सेवा खुला गरेका हौं,” पौडेलले भने।अब केवलकार पहिलेको तालिका अनुसार बिहान ६ बजेबाट राति १० बजेसम्म सञ्चालन हुनेछ।
केवलकार बन्द हुँदा माथिल्लो स्टेशनमा रहेको इला रिसोर्टको व्यवसाय पनि प्रभावित भएको थियो। केवलकार पुनः सञ्चालनमा आएपछि सेवाग्राही बढ्ने र अझ गुणस्तरीय सेवा प्रदान गर्न सकिने इला रिसोर्ट तथा मौलाकाली केवलकारका महाप्रबन्धक अरविन्द्र केसीले बताएका छन्।
यस्तै, केवलकार नचल्दा मौलाकालिका मन्दिरमा आउने भक्तजनको संख्या उल्लेख्य रूपमा घटेको धार्मिक सेवा समिति मौलाकालिका मन्दिरका अध्यक्ष शालिकराम सापकोटाले बताए। उनका अनुसार आजदेखि सेवा खुलेसँगै पुनः भक्तजनको चहलपहल बढ्ने अपेक्षा गरिएको छ।
२०८० वैशाखदेखि सञ्चालनमा आएको मौलाकाली केवलकारमार्फत हालसम्म करिब ६ लाखभन्दा बढी सेवाग्राहीले सेवा लिइसकेका छन्। केवलकार सञ्चालनले यस क्षेत्रको पर्यटन प्रवर्द्धन, स्थानीय अर्थतन्त्र तथा सामाजिक संस्थाहरूलाई उल्लेखनीय फाइदा पर्खिरहेको छ।
