उज्यालो खबर
गैडाकोट – राष्ट्रिय स्वतन्त्र पार्टी (रास्वपा) गैडाकोट नगर समितिले विभिन्न १० विभागमा प्रमुख, उपप्रमुख र सदस्य मनोनयन गर्दै संगठनलाई संगठित तथा प्रभावकारी बनाउने उद्देश्यले ठूलो संरचनात्मक कार्य सम्पन्न गरेको छ। नगर सभापति बिमल घिमिरेका अनुसार यो प्रक्रिया पार्टीको स्थानीय गतिविधि सक्रियता, सुशासन प्रवर्द्धन र जनसमस्यासँग प्रत्यक्ष सम्बन्धित कामलाई संस्थागत बनाउने अभियानको महत्वपूर्ण चरण हो।
जनसम्पर्क विभागमा ढुण्डिराज आचार्यलाई प्रमुख र अमृता बगालेलाई उपप्रमुख तोकिएको छ भने विष्णु सापकोटा, रुद्र आचार्य र गुञ्जन चुनी सदस्य रहेको नगर समितिले जनाएको छ। सुशासन र पारदर्शितालाई प्राथमिकता दिंदै भ्रष्टाचार निवारण प्रवर्धन तथा सुशासन विभागको नेतृत्व रामप्रसाद शर्मा र ओमप्रकाश सुवेदीलाई जिम्मा दिइएको छ।
जनगुनासो सुन्ने तथा समाधानका लागि गठन गरिएको गुनासो व्यवस्थापन विभागको प्रमुखमा भगवती सापकोटा, उपप्रमुखमा जानुका न्यौपाने र सदस्यमा अमृता पौडेल तथा सुरज घिमिरे चयन भएका छन्। त्यस्तै वन तथा वातावरण विभागमा कृष्ण पौडेल प्रमुख र तुलसी शर्मा उपप्रमुख बनेका छन् भने शुक्लाल आले सदस्य रहेका छन्।
युवा तथा खेलकुद विभागको जिम्मेवारी बिनु पोखरेलले प्रमुखका रूपमा सम्हाल्नेछन् भने खेमबहादुर सुर्पाङ उपप्रमुखका रूपमा रहनेछन्। श्रमिक अधिकार र उपभोक्ता हित संरक्षणका लागि गठन गरिएको श्रम तथा उपभोक्ता विभागको प्रमुखमा भोला तिवारी, उपप्रमुखमा हरिप्रसाद शर्मा र सदस्यमा रेशमलाल श्रेष्ठ छन्।
महिला तथा सामाजिक विकास विभागमा सीता पोख्रेल प्रमुख र सीता पौडेल उपप्रमुख तोकिएका छन्। विभागमा शिक्षा उप्रेति, लक्ष्मी श्रेष्ठ, दिलमाया नेपाली, सुनिता नेपाली र तिला शर्मा पौडेल सदस्यका रूपमा रहेका छन्। सहकारी क्षेत्रलाई व्यवस्थित बनाउने उद्देश्यले टिकाराम पराजुली प्रमुख, उमानन्द कँडेल उपप्रमुख र लिलाधर खरेल तथा लक्ष्मी सापकोटा सदस्य तोकिएको छ।
उद्योग तथा वाणिज्य विभागको नेतृत्व शिशिर क्षेत्रीले गर्नेछन् भने सुरज ढकाल उपप्रमुख र रामनाथ आचार्य सदस्य रहेका छन्। कृषि क्षेत्रमा सेवा प्रवाहका लागि इन्द्रमणि चालिसे प्रमुख, रामलाल पौडेल उपप्रमुख तथा लोकनाथ कँडेल र नरेश्वर आचार्य सदस्य मनोनयन भएका छन्।
यसैबीच, नेकपा एमाले परित्याग गरेका गैडाकोट–१३ का ऋषि गौतमलाई नगर सदस्यको जिम्मेवारी प्रदान गरिएको छ, जसले स्थानीय तहमा रास्वपाको संगठनात्मक शक्ति र जनसंपर्कमा थप योगदान पुर्याउने अपेक्षा गरिएको छ।
नगर सभापति बिमल घिमिरेले विभागीय संरचना पूर्णत: सक्रिय भएसँगै गैडाकोटमा सुशासन, विकास, जनसेवा र पारदर्शितामुखी सरकारी सरोकारका विषयमा रास्वपा अझ प्रभावकारी भएर अघि बढ्ने विश्वास व्यक्त गरे। “हरेक विभागले अब क्षेत्रगत योजनासहित जनतासँग प्रत्यक्ष समन्वयमा काम गर्नेछ,” घिमिरेले भने, “गैडाकोटमा वैकल्पिक राजनीतिलाई जनताले व्यवहारमै अनुभव गर्ने वातावरण बन्न थालेको छ।”
रास्वपाले आगामी दिनमा यी सबै विभागमार्फत लक्ष्यअनुसारका कार्यक्रम सार्वजनिक गर्ने र स्थानीय तहमा प्रत्यक्ष प्रभाव पार्ने परियोजनाहरू अघि बढाउने तयारी गरेको छ।
