उज्यालो खबर
गैंडाकोट- गैंडाकोट नगरपालिकाले मंगलबार ‘प्रविधिको सही प्रयोग गरौँ, लैङ्गिक हिंसा अन्त्य गरौँ’ भन्ने नाराका साथ लैङ्गिक हिंसा विरुद्धको १६ दिने अभियान सुरु गरेको छ। नगरपालिकाको आयोजनामा तथा आफन्त नेपालको सहकार्यमा आयोजित कार्यक्रम अन्तरक्रिया र प्रतिबद्धता पत्रमा हस्ताक्षरसँगै उद्घाटन गरिएको हो।
कार्यक्रममा सहभागिहरूले सार्वजनिक वा निजी जीवनमा लिङ्गका आधारमा गरिने शारीरिक, मानसिक वा यौनजन्य हानी नै लैङ्गिक हिंसा भएको उल्लेख गर्दै यस्तो हिंसा रोकथामका लागि सबैले संयुक्त रूपमा आवाज उठाउनुपर्नेमा जोड दिए।
गैंडाकोट नगरपालिकाका उपप्रमुख शान्ति कोइरालाले विद्यालय, समुदाय तथा पालिका तहमा विभिन्न सचेतनामूलक कार्यक्रम संचालन गरिने बताउँदै हिंसा न्यूनीकरणका लागि सबैले हातेमालो गर्नुपर्नेमा जोड दिइन्। उनले हिंसा अन्त्यका लागि आर्थिक तथा मानसिक रूपमा सबल बन्ने आवश्यकता पनि औँल्याइन्।
नगर प्रमुख मदनभक्त अधिकारीले शिक्षित समुदायभित्र पनि हिंसाका घटनाहरू देखिनु चिन्ताजनक रहेको बताउँदै यस विषयमा सबै सरोकारवालाले गम्भीर बन्नुपर्ने धारणा राखे।
कार्यक्रममा प्रमुख प्रशासकीय अधिकृत रामचन्द्र लामगादे लगायत कर्मचारीहरूको उपस्थिति रहेको थियो। स्वागत तथा सहजीकरण महिला तथा बालबालिका शाखा प्रमुख राधा पौडेलले गरेकी थिइन्।
यसैबीच, चितवनमा पनि आजदेखि १६ दिने अभियान औपचारिक रूपमा सुरु गरिएको छ। जिल्ला समन्वय समिति चितवनका प्रमुख नारायणप्रसाद अधिकारी, प्रमुख जिल्ला अधिकारी गणेश अर्याल तथा स्थानीय तहका उपप्रमुख र अधिकारकर्मीहरूको उपस्थितिमा अभियान प्रारम्भ गरिएको हो।
जिल्लास्तरीय लैङ्गिक हिंसा नियन्त्रण सञ्जालले १६ दिनसम्मका कार्यक्रमहरूको कार्ययोजना सार्वजनिक गरेको छ। कार्यक्रममा नेपाल प्रहरीले जिल्लामा दर्ता भएका लैङ्गिक हिंसासम्बन्धी विवरणसमेत प्रस्तुत गरेको थियो।
