उज्यालो खबर
चितवनको माडी नगरपालिकाले घर तथा जग्गा नक्सा पास र अभिलेखीकरण नगर्ने नगरबासीलाई विभिन्न सेवाबाट वञ्चित गर्ने निर्णय गरेको छ। नगरपालिकाले आगामी पुस मसान्तसम्म अभिलेखीकरण पूरा गर्ने समयसीमा तोकेको छ। सो अवधिभित्र अभिलेखीकरण नगरेका नगरबासीले नगरपालिकाबाट प्रदान गरिने सेवाहरू प्राप्त गर्न पाउने छैनन्।
नगरपालिकाका प्रमुख प्रशासकीय अधिकृत जगतप्रसाद भुसालका अनुसार, पुस मसान्तसम्म अभिलेखीकरण नगर्नेहरूलाई घरजग्गा मूल्याङ्कनको सिफारिस, बैंकिङ कारोबारका लागि सिफारिस, विपद्का घटनामा राहत तथा क्षतिपूर्तिका लागि सिफारिस जस्ता सेवाहरू रोक लगाइनेछ। साथै, पुस मसान्तपछि अभिलेखीकरण गराउनुपर्ने भए हाल लिइने शुल्कभन्दा दोब्बर राजस्व बुझाउनुपर्ने व्यवस्था गरिएको छ।
प्रमुख प्रशासकीय अधिकृत भुसालले भने, “पालिकाले गत असारमा स्वीकृत गरेको कार्यविधिअनुसार अभिलेखीकरण गर्न सबैमा सूचित गरिएको छ। अभिलेखीकरण नगर्दा कार्यालयबाट दिइने सेवाबाट वञ्चित हुनु पर्ने अवस्था आउँछ।”
घरजग्गा नक्सा पास र अभिलेखीकरणले नगरपालिकालाई हरेक व्यक्तिको भौतिक सम्पत्तिको विवरण प्राप्त गर्न मद्दत पुर्याउनेछ। यसबाट नगरमा उपलब्ध सेवाहरूमा सहज पहुँच विस्तार हुने र विकासका योजनाहरू तयार पार्न सजिलो हुने विश्वास गरिएको छ। भुसालले थपे, “कुनै विपद्का घटना भए वास्तविक क्षतिको विवरण लिन, राहत र क्षतिपूर्तिको सिफारिस गर्न, सुरक्षित आवासको अवधारणा कार्यान्वयन गर्न मार्ग प्रशस्त हुनेछ।”
नगरपालिकाभित्र कुनै पनि स्वीकृत नलिइ निर्माण भएका घर/भवनको अभिलेखीकरण गर्न नगरबासीलाई आग्रह गरिएको छ। हालसम्म, दश हजारभन्दा बढी परिवार रहेको माडी नगरपालिकामा २१० घरमात्रै अभिलेखीकरण भइसकेको प्रमुख प्रशासकीय अधिकृत भुसालले जानकारी दिए।
